Empoderá mucha i hóbennan pa nan ta sigur durante di e Programa di Scouting.

Pa logra e proyekto edukativo di Scouting, mester implementá un programa di hóben di kalidat. E elementonan edukativo den e programa di hóben, ta brinda e mucha i hóbennan e medionan pa nan empoderá, motivá i protehá nan mes i konstruí un relashon sano di diálogo i aliansa ku adultonan. Krea i mantené un ambiente sigur na tur momentu, ta parti esensial di un Programa di Hóben di kalidat, i esaki mester ta visibel na tur momentu.

E método Scout

Ora apliká e Método Scout apropiadamente, e ta aktivá mucha- i hóbennan pa prevení violensia, ta eduká nan pa tin rèspèt pa nan mes i pa otro i ta yuda pa desaroyá un ambiente sigur pa hóbennan.

E prinsipionan di Scouting ta pa sostené e desaroyo holístiko di individuonan hóben pa yega na konfiansa propio i personalidat reflektivo.

Sinembargo, e prinsipionan di e Método Scout por ta na mes momentu vulnerabel pa abuzu, mal uzo òf mal komprondementu. Un interpretashon eroneo di algun ritual, tradishon òf elementonan di e método Scout por generá situashonnan dañino i abusivo pa mucha, hóben i inkluso adultonan.

Pues, mester konsiderá e dos bandanan di e medaya: e Método Scout ta un hèrmènt di gran balor i apoyo den e desaroyo di e mucha i hóben, sinembargo, e ta tambe vulnerabel pa mal interpretashon i mal uzo. Ta ròl di tur adulto den Scouting pa garantisá ku e método Scout ta ser implementá na un manera sigur i ta evitá ku ta produsí abuzu bou di e argumento di tradishon.